NAĎKINDË LAJŠEMA

Mitrej, piže duginem,
Mitrej, mazï duginem!
Oh, raužo Kulomaś
Mastoronť langa jakaś.
Panžoź orta son vešneś,
Panžoź kenkške son mučkaś.
Toń ortïnes, duginem,
Apak učo son vačkodś,
Toń kenkšezëť, jalginem,
Jondolt-puŕgineť zëŕkadsť.
Vasov-vasov tujekšniť,
Inevedeń tombalev,
Tostojak son muinzeť,
Tostojak son redinzeť.
Viť keďsënzë Kulomanť
Kulomań torozo,
Kerš keďsënzë Kulomanť
Kulomań kečezë.
Vasńa kerinze son piľge sanot –
Piľge vijde maštïnzeť,
Mejle kerinze son keď sanot –
Keď vijnede maštïnzeť,
Čopolgavtïnze preveť –
Valdo ojmeť saize.
Oh, Mitrejkaj, duginem!
Užo varštan mon sëŕgat –
Ezembŕazot śukońan,
Užo varštan kuvalmat –
Piľge pezëť śukońan.
Meneľ tešttne – toń seľmeť –
Końavsť, nej a panžoviť,
Parsej sureť – toń čereť –
Surkskeks nej a menčeviť.
Vide piče toń sëreť
Čuvtoń sumańsë oršaź,
Šožda piľgeť, duginem,
Čuvtoń kemnesë karseź.
Oh, duginem-jalginem,
Valdo preveń maksïjnem!
Avoľ moro teť rangstïń –
Laži vajgeľ mon targiń.
Iľa tandadt vajgeľdem,
Iľa seŕsťav laštkedem.
Rungot peŕka mon jutan,
Ojmeť marto mon kortńan.
Vaj, eŕamstot-aštemstëť
Lamo staka ton kandïť,
Pingeń kiva molemstëť,
Jalgaj, pek ton sizekšnïť.
Užo, dugaj, ledsťasa
«Mastoravań» tejemanť,
Užo, dugaj, pačťasa
«Mastoravań» čačomanť.
Purnavkšnïnek erźatne
Raśkeń tevde kortamo,
Vastovkšnïnek erźatne
Vejsëń prevsë arseme.
Se promkssonť-vastomasonť
Miń kočkidiź toń Pŕavtoks,
Vejsëń prevsë, ve meľsë
Aravtïdiź Vetićaks.
Užo kevksťsa, duginem,
Eseń pŕam, eś sedejem,
Oh, kiveďsa, jalginem,
Rizksës čopavteź ojmem:
Meks toń lavtovs, duginem,
Praś-śavorś te pokš kanstoś?
Meks toń kiŕgas, jalginem,
Povodevś lišmeń aškoś?
Vejenst uľnesť pek jožovt,
Bažasť ve jondo vannoms,
Eś pŕań vanstomaś uľneś
Sïnest vasenće teveks.
Lijat uľnesť pek lavšot,
Sïń vetićaks ezť maštovt.
Kolmonst uľnesť pelićat,
Nilenst – «sëredsť», «a šumbraľť».
Ton uľniť sehte prevej,
Ton uľniť sehte vijev,
Ton uľniť apelića,
Ton uľniť sehte šumbraś!
Vaj, kov tejsa mon rizksëm,
Kozoń kekšsa meľavksom?
Jortovlija pokš pakśas, –
Peľan, modaś koľsťavi,
Norovavaś ordadï,
Lotki śuroń čačtomo.
Vaľavlija viŕ kunškas,
Viŕavaś kežijavtï –
Peľan, virenek kośkiť,
Mastoravaś štapśkadï.
Valdo veďs kajavlija,
Kadïk vai oťmanteń, –
Peľan, vedeś koľsťavi,
Veďavaś pokordavi.
Vaj, čudeź, seľvedť, čudede
Sijań povneks čamavam,
Čudede, seľvedť, čudede
Ašo ksnavneks meštevam.
Oh, čudede, seľvedť, čudede
Valdo lejneks rungovam,
Promodo, seľvedť, promodo
Sijań eŕkeks elezëm.
Se eŕkenteń, duginem,
Mon meľavksom vajavtsa,
Seľveď pots sëpej rizksënť,
Mon, dugaj, lepijavtsa.
Prevsputïćam, jalginem!
Sïrneń pokoľť – toń preveť,
Tiriń avań – sedejeť,
Pazoń ojme – toń ojmeť!
Erźań Pŕavtoks ulemstëť,
Valdoń kandïks molemstëť
Lamo naŕgamot pečtiť,
Lamo aparot kirdiť.
Dušman lomanť, jat lomanť
Paro lemeť seľgenesť,
Idemevseń vardotne
Eŕva mejsë tandavtnesť.
Sïń sezniź psi sedejeť,
Veŕs razediź toń maksot,
Veń udomat sïń saiź,
Čiń ojmamot sïń neľgiź.
Ťušťań kiva tujemstëť,
Pazoń Mastors livtemstëť
Maksan teť karmavtoma,
Jovtan teť eńaldoma:
Tonačiv pačkodemstë,
Pazonť ikelev sťamsto
Jovtniť raśkeń rizksënek,
Panžiť pokš meľavksonok.
Kadïk Pazonok varštï,
Kadïk Pazonok lezdï
Erźaks pŕanok maŕamo,
Erźań kojsë eŕamo.
Ineškipazonť vaksso
Ton uľat viť keď jono,
Ineškipaz ikele
A viźks uli teť aštems.
Tonačiv pačkodemstë
Pokšťań pokšt toń vasttadïź,
Esest jutks sïń sajťadïź –
Ine sedejeť kisë,
Erźań bažamot kisë.

D.T. Naďkinëń valdo lemenzë ledstnemga

Raužo kuľaś, prok puŕgine, zëŕkstaś –
Tiriń Mastorgam sëpej kačam sradś:
Erźań Purgazonť pingeń kizë pekstavś!
Jattnë kećazevsť: «Okojniki, vradś!»

Erźasojak vastneviť śolmov lomanť!
Kučni ejsëst sonś Ineškipazoś
Sťavtoms raśkenť, konata ašti komaź,
Kona jomamos tago-meks azoź.

Isťat lomantne palïť, teke štatolt.
Sïń eždiť sedejť dï valdomtïť kinť.
A kuvať eŕaź, vidiť apak kavtoldt
Oľačiń viďmeť, śulmiť Modanť-Činť.

Jatoń lomantne – Idemevseń vijtne
Potiť sïnst verest, tapiť-sëviť sval…
Kećak, raśkem! Čopoda preveť vitems
Komseće pingeś putś Oznomapal!

1992

Jutan peleveń sëťme kurinkavam,
Moľan lej čirev, kuźan pando pŕas
Dï Pazonť marto kortńan sedejškava,
Maksozo vij lavšomoź ojmem tŕams.

Tiriń velem eś kelenzë jomavtï,
Mejeľće erźat potïť tonačiv,
Jat lomanť jurtozonok kudot sťavtïť,
Iznize «zdraśteś» erźań «šumbračinť».

Kijak a čaŕkodi moń sedejrizksënť;
Eka meľavksoś: ruzïi veleś!
…Vejkine lišmenť stuvtïź terťams pikssë –
Son, prok sulej, sťaś čavo pakśanť pes.

1992