TELEŚ ŠANČNI ARDÏ KARGOŃ KIVANŤ…

TEĽŃA

Teleś šančni ardï Kargoń Kivanť,
Sijań salmukst suvtni veń meneľstë,
Jala verev kepedevti sivenť
Dï lovonť čikordovtï gajtevstë.
Varmaś vakssom ormav lomańks leksi,
Noski, prok stardïze sudokstomo.
Kudojutkotneva meštes ešksi:
Paŕak, isťa lisni moń vastomo?..
Sodan: kapšaź čijat karšom vandï
Dï teŕavtat, peleź, kutmordamom.
Vastomaś tago keńarks a kandï:
Avoľ rungom – ojmemgak purdavi.

1987

Suťamsť kuztnë, vireś sëťme – ojmsi.
Varmaś, teke katka, lisni-sovsi.
Lovoń tešttneń salmukstnës neŕgstavtni,
Meŕat, panart čuvttnëń langa stavtni.

Moľan, eseń marto sasto kortneź,
Staka meľtneń kadan, viŕ pots jortńan.
Kadïk śokseń lopaks sïń peveriť
Dï ojmem riznëmaso a keriť.

1985

Mezeks moń kuztembeva ton tapat
Dï sťakoń valtnëń mastorga peverďat?
Mezeks jutazenť moneń ods ledstńat
Dï ejkakšpingev tago ejsëm terďat?
Vasov-vasov ajgevś se mazïj škaś!
A čijat tov dï mejsëjak a ardat.
Vannan: toń ćorat eseť sëŕsë kasś…
Mon, paŕak, seks eś bažamotneń kardan.
Miń eŕva kizna kapšatano tej:
Ledstnemań tansť vastomaś tenek kadï.
…Čudi minek jutkova pingeń lej,
Kona ijestë ijes kelejgadï.

1989

Tago javinek martot viŕ čiresë:
Nuŕka kortamo dï rizksëv palamo.
Kavto pelev veťasť ejsënek kitne:
Moneń tujema, toneť – kudov samo.

Końasïń seľmem dï teke kinoso
Tago nesa minek javoma tarkanť,
Koda vannat meľgam roź pakśanť pesë
Dï koda kapšaź kirvazťat ćigarkanť…

1986

Maŕavś, a vasolojak škaś,
Źardo avam moń čertneń kodaś.
Źaroksť veľavtś Činť peŕka Modaś? –
Nej mon avań tusto čertnestë
Sijas navaź pulïneť kodan.

1985

Meneľ a nejat,
Perťpeľga tuń a varštat,
Kapšat jala, kapšat.
Ton čaroso urnëks pevteme veľat-veľat…
Šeškat ve tarkaso, esteť maŕavi – eŕat.

1985

Aparonť ejzëm jortïk rudaz pokoľks.
Eś pŕanť viteme bažaź, moń čumondïť.
Vizdemań apak soda mančiť –
Kije ejstënek sede mańavś?

Isťa lijasto, simemanť javavtoź,
Beŕań lomaneś lijaśmapŕanteń seľgi.
Son čavo pŕaso tuń a arsi:
Eś ojmenť paćki – avoľ vedenť.

1985

Źardo leti jutams moneń tija,
Sëpej mizolks čači turvam pes:
Mon sedejem talnoź teť venstija –
Ton žo sonzë kapšaź neŕgstïk zeps.

1985