GUĽKINE

Eŕasť-ajšť aťat babat kavonest. Uľnesť sïnst kavto ejkakšost: ćorïne da tejteŕne. Babaś praś dï kuloś. Kadovsť ejkakšnë avavtomo. Sïń čistë meriť teťasteń: „Teťaj, sajť od ava! teťaj, sajť od ava!”

Teťaś meri tenst: „Sajan, ejdeń, da melezënk tujezë”.

— Mejś a tui? Sajť!

Teťaś sajś od ava. Eŕasť-ajšť alamos. Od ava meri teťasteń: „Pečkik ćorïneť, karman martot eŕamo, a pečksak — a karman!”

Teťaś kulconïze ninzë, pečkize ćorïnenzë. Od avaś pidize i ozasť stoľ ekšs jarcamo, a tejteŕnenť paniź kenkš ugols.

Jarcïť sïveľdenť, lovažaťneń jortliť kenkš ugols, tejteŕnenť lanks. Tejteŕś avaŕdi i meze jortïť langozonzo lovažaťneń — purnï. Koda vese lovažaťne purnavsť, śulminze ašo paćines i putïńze pizïne pŕas.

Pizïne pŕasonť lovažaťne tejevsť guľkineks. Libor meŕneś guľkineś, livťaś uľćav.

Jutï uľćava uroń mikšnića. Guľkineś valkś čiŕke pŕazonzo i meri tenzë: „Uroń mikšnića, a uroń mikšnića! tuka teń ve komoro urot, moro tenť moran”. Uroń mikšnićaś maksś tenzë komoro urot. Guľkineś karmaś moramo:

„Guldor- guv- guv- guv! Eś tetinem pečkimem.
" " " " Od avinem pidimem.
" " " " Pŕakavtomo sëvimiź.
" " " " Patineń lanks jortlimiź.
" " " " Moń patinem purnïmem.
" " " " Ašo paćas śulmimem.
" " " " Pizïne pŕas putïmem.
" " " " Mon guľkineks tejeviń.”

Morïze moronť guľkineś i tago tuś livťamo. Jutï karčozonzo salmuksoń mikšnića. Guľkineś ozaś čiŕkenzë pŕas i meri: „Salmuksoń mikšnića, a salmuksoń mikšnića! Tuka moneń ve komoro salmukst, moro tenť moran!”

Salmuksoń mikšnićaś maksś tenzë komoro salmukst. Guľkineś morïze tenzë seke moronť i tuś tago livťamo.

Jutï karčozonzo medeń mikšnića. Ozaś guľkineś čiŕkenzë pŕas i meri tenzë: „Medeń mkišnića, a medeń mikšnića! Tuka moneń ve penč meď, moro moran tenť”. Medeń mikšnićaś maksś tenzë meď. Guľkineś karmaś moramo: „Guldor-guv-guv-guv! Eś tetinem pečkimem.”

Moravś morozo, tago tuś livťamo. Livťaś mekev kudov. Ozaś kudo kenkš veľksës i karmaś moramo:

„Guldor- guv- guv- guv! Eś tetinem pečkimem.
" " " " Od avinem pidimem.
" " " " Pŕakavtomo sëvimiź.
" " " " Patineń lanks jortlimiź.
" " " " Moń patinem purnïmem.
" " " " Ašo paćas śulmimem.
" " " " Pizïne pŕas putïmem.
" " " " Mon guľkineks tejeviń.”
Marize moramodo teťazo. Panžize kenkšenť i vanï verev kurgoń avteź. Guľkineś kaińze kurgozonzo komoro uroťneń. Teťaś povavś dï kuloś.

Guľkineś tago karmaś moramo: „Guldor-guv-guv!!.” Marize od avaś. Liś kudïkelev, avtize kurgozo i kulconi. Guľkineś kaińze kurgozonzo komoro salmuksnëń. Povavś od avaśkak i kuloś.

Guľkineś tago karmaś moramo: „Guldor-guv-guv”. Marize paťazo. Liś kudïkelev i kulconi. Guľkineś kaize kurgozonzo meď penčenť, a sonś tejevś mekev ćorïneks i karmasť paťanť marto kavonest eŕamo.

Makar Jevsevev. Erźań jovkst // Purnïńze M.Je. Jevsevev — Moskva: SSSR-eń Narotnëń ćentraľnoj izdateľstvaś, 1928