KODA DURAK SALOŃ RAMAMO JAKAŚ

Eŕaśt ajšť aťat babat kavonest. Ulneś synst ve ćorïnest — duraćke. Aťaś praś dï kuloś. Babaś kalmize. Purnaś babaś pominkat; duraćke ćorańt kučize saloń ramamo.

— Aźo, meri, ćorïnem, batman sal ramak!

— Moľan, — meri ćorïneś.

— Aźo, dï vanok, iľak stuvt, zńaro ramams! — ton kuva moľat, jala mert: batman, batman, ato stuvcak!

Tuś durakś, sonś kuva moli, „batman, batman!” meri.

Pačkoć tinge-pire vic. Tinge-piresënt tovźuro pivsït. Son meri tenst: „Batman, batman, čop pivsëde, batman pivsëde!”

Pivcïćatne koda kundasïź durakoń i davaj čavmonzo. Čavśt, čavśt, — noldïź.

Saś kudov duraćke, — avardi.

— Mejś avarďat, duraćke? — avazo kevstize.

— Mejś? Mon koda lisin kudosto, monś jutan, monś jala meŕan: batman, batman. Pačkodin tinge-pire vic, toso tovźuro pivsït. Mon merin tenst: čop pivsëde, batman pivsëde! Sïn kundïmïź moń, — čavimiź, čavimiź dï noldïmiź!

— Eh, durak, ton merevlet tenst: śadoń-śadoń pivsëde, — vejte-vejte iľado!

Tago tuś durak. Kuva jutï seeri: śadoń, śadoń! śadoń, śadoń!

Kandït karčonzo kuloź lomań kalmamo. Son meri tenst: „Śadoń-śadoń kulodo, — vejte-vejte iľado!”

Kandïćatne koda kundasïź duracken i davaj čavmonzo. Čavśt, čavśt — noldïź. Tago kudov saś durak avardeź.

— Mejś tago avarďat?

— Dï, mejś? jutan kijava, karčon kandït kuloź lomań, — mon merin tenst: śadoń-śadoń kulodo, vejte-vejte iľado! Kandïćatne koda kundasamiź, — čavimiź, čavimiź dï noldïmiź?

— Eh, durak, ton merevlet tenst „carstva nebesnoj!”

Tago tuś durak. Karčonzo ardï svaďba. Durak meri svaďbasten: „Carstva nebesnoj tenk!” Kudatne koda kundasïź durakoń, čavśt, čavśt esnënzë — noldïź.

Durak tago saś kudov avardeź, i jovtnize avanstën — mejś čaviź.

Avazo meri tenzë: eh, durak, durak, — nesak svaďba ardï, — kajavlit ponksot dï kištevlet!

Tago tuś durak. Vanï — požar, — ve aťań ostatka kudïnezë palï. Son molś požarśt vaks, kainze ponksonzo i davaj kišteme. Aťaś koda kundasazo, davaj čavmonzo. Pels-kuloms čavize dï noldïze. Saś kudov durak avardeź, jovtlize avanstën, mejś čaviź. Avaś meri: „Eh, durak, durak, — ton sajevlet ved, dï macťavlek požarśt”.

Durak tago tuś lija prev marto.

Ki lankso ve aťa tuvo kirtï. Son koda sai vedra dï davaj tolońt macťamo. Aťaś kundïze durakoń i davaj čavmonzo. Čavś, čavś — noldïze.

Tago saś kudov avardeź i jovtnize avanstën, mejś čaviź.

Avaś meri: „Eh, durak, ton bu merevlet bog pomoč tenzë.”

Tago tuś durakś. Ki čiresë pop serni. Son meri tenzë: „Bačka, bog pomoč tent!” Koda kundasazo popoś! Čavś, čavś esnënzë — noldïze.

Saś kudov tago avardi. Avaś tago kučiksëlse, vansazo durakoń kiśkent vese šiškat-palkat saiź, i eśse kučt. Kadovś batman salost apak ramak.

Valmelgavks: Durak melga lukuškaso prevť a kantlivat!

Makar Evsevjev. Erźań jovkst // Purnïnze M.E. Evsevjev — Moskva: SSSR-en Narotnën centraľnoj izdatelstvaś, 1928