Erźań aktivistnë tirin kelenten tonavtnemga anokstaśt sajt

Ińazoroń Sekretariatozo, noldaś  od resursoń Inealtymaso prezentacija. Te resursońt ťokšmeleś kelejgavtoms erźaks kortamodońt sodamočint. 

Sajtsońt «ruzoń- erźań» dï «erźań ruzoń» valkstnë, elektronoń kinigań biblioteka, erźań kelenten «Eś pŕań tonavtïća» (samoučitel) dï erva kodat putovkst, konat lezdït važodems erźaks śormadozent marto.  

Ińazoroś jovtïze melenzë noldaź projekttënt.

— Pek lamo teči śormadoź Rossijań Federacijaso tirin keltnen kažočident. Net keltnen raśketne snartnit vanstamo, velmevteme, anśak net teŕavtomatnen kisë kirdivijeś synst čumovtï «separatizmaso dï rusofobijaso». Lomantne isťa tandavtneź, natoj pelit kameras erźań valmorojak lovnomo», teškstïze Ińazoroś. 

Sonzë kojsë, kirdijent assimiľacijań politikadońt tirin raśkent vanstomga eŕavi važodems teči. 

—Vievgavtoms erźań kelent pozicijatnen Inealtymaso – vejkeś set karmavtomatnede, konat topavtan mon Ińazoroń kojsë dï Aťań Ezemeś. Min teinek te sajtońt eś jarmak langs, kodamojak lezdamo arasel koda respublikań kirdivijdent pelde isťa lija mostortnëdejak. Nej erźatne važodit erźań-ruzoń dï ruzoń-erźań valkstnën marto. Ejsëst 19 643 valt dï valśulmavkst, konatatnen eŕaza erźatne purnaśt kemen ijen kuvalt. Te erźa raśkent vejsën valksoś. Teke škastońt min purnatano tozoń jovksket, jovtnemat, valmorot, -merś Sïreś.

Te sajtońt tejemga važodśt sisem lomańt. Valksoś tejeź setnen turtov kin uli melest tonavtnems erźań kelenten dï sonzë vadŕalgavtïćatnenengak. Vese tolkovića tekstnë, instrukcijatne, śormadoź ruzoks. Erźań tekstnë śormadoź latinën tešksë, konatnesë śormadovit vese erźań Kirdijurońt dokumentënzë. 

Rossijań Federacijasońt zakontnësë kardaź latinën grafikań tevsputomaś respublikań keltnes. Erźań keleś vejkeś Mordovijań kirdij keltnede. 

Tede ikele Ińazoroń Sekretariatoś nevtize «ERŹAŃ VAL» žurnaloń prezentacijazo, kona sravtnevi  końovs putoź, isťa Inealtymasojak. 

Sïća škastońt Ińazoroń Sekretariatoś anokstï erźań ejdetnen turtov audio knigań noldamo. 

"Idel.Realii" ikele jovtneśt «Erźań kočkavića kurotnen kočkamodo dï važodemado Kojluvdońt», kona ulneś kemekstaź Aťań Ezemsënt. Kojluvosońt lamo vejkeksči krïmentatartnën Kojluvońt marto.