TUNDOŃ SAMO

Purdtnevsť, tapavsť pakśań kitne-jantnë:
Sïredś teleś, dï morgijasť santnë.
Čokšnëť-valskeť pŕanť jala a maksï.
Čiń kunškat čaŕkodi: tundoś vakssom!

Koda staka javoms od poradot,
Źardo uvnoś davoloń moramoś!
Lavšomgadś dï engamś ine vijeś,
Pingeś, meŕat, jutaś, teke čijeź.

Mejeľće arsemat teleś arsi,
Mejeľće ledstnemat meľstë targsi.
Činzë čop avardiť ejźuronzo –
Tundoś veľdest raštï gaj moronzo.

1988

Se tundoś uľneś veľť taŕksëv, jakšamo.
Varmaś uvnoś uśktnesë, meŕat, lajšeś.
Pizeme bajgtneń bažaś keŕkss keŕksamo
Dï, kežďaź, vaľmatnes komorso kajseś.

Tardića ojmeť sestë kavto vastovsť
Dï, lembeń vešneź, vejke-vejkes nežďasť.
Araseľ vij, tolbanďaś eź kirvaztevť –
Sïń ojme koštsost vejke-vejkeń ežďasť.

1986

Umok sodan: ton lija avań mirde.
Toń mešťsë moneń – anśak jalgań sedej.
Mongak a bažan toń eś vaksso kirdems,
Seks anśak jalgaks śuvordïja kedeť.

Ton, koda jalga, sakšnïť moń varštamo,
Mon, koda jalga, vastïtiń-iľtitiń.
Mezeks moneń sëpeś tago korštamo?
Mon ejstënzë mik sedejga niľgediń.

Vele ušoso, kalmazïrenť vaksso,
Koso erźań pokšťatne sasto udïť,
Javomsto apak talno keď teť maksïń
Dï čijeź noškstïń, teke ejsëm kundïľť.

Miń martot jalgat, anśak paro jalgat.
Avoľ večkićat – kudoń-čiń teićat!
…Gremaćka lejs moń seľmekertneń alga
Kapšaź orgodsť kavto salov čiićat.

Umok sodan: ton lija avań mirde,
Mon seks a bažan toń eś vaksso kirdems…

1993