TELEŚ ŠANČNI ARDÏ KARGOŃ KIVAŃT…

TELŃA

Teleś šančni ardï Kargoń Kivańt,
Sijań salmukst suvtni ven menelstë,
Jala verev kepedevti sivent
Dï lovońt čikordovtï gajtevstë.
Varmaś vakssom ormav lomańks leksi,
Noski, prok stardïze sudokstomo.
Kudojutkotneva meštes ešksi:
Paŕak, isťa lisni moń vastomo?..
Sodan: kapšaź čijat karšom vandï
Dï teŕavtat, peleź, kutmordamom.
Vastomaś tago keńarks a kandï:
Avoľ rungom – ojmemgak purdavi.

1987

Suťamśt kuztnë, vireś sëtme – ojmsi.
Varmaś, teke katka, lisni-sovsi.
Lovoń tešttnen salmukstnës nergstavtni,
Meŕat, panart čuvttnën langa stavtni.

Moľan, esen marto sasto kortneź,
Staka meltnen kadan, vir pots jortńan.
Kadïk śoksen lopaks sïn peverit
Dï ojmem riznëmaso a kerit.

1985

Mezeks moń kuztembeva ton tapat
Dï sťakoń valtnën mastorga peverďat?
Mezeks jutazent monen ods ledstńat
Dï ejkakšpingev tago ejsëm terďat?
Vasov-vasov ajgevś se mazïj škaś!
A čijat tov dï mejsëjak a ardat.
Vannan: toń ćorat eset sërsë kasś…
Mon, paŕak, seks eś bažamotnen kardan.
Min erva kizna kapšatano tej:
Ledstnemań tanśt vastomaś tenek kadï.
…Čudi minek jutkova pingen lej,
Kona ijestë ijes kelejgadï.

1989

Tago javinek martot vir čiresë:
Nuŕka kortamo dï rizksëv palamo.
Kavto pelev veťaśt ejsënek kitne:
Monen tujema, tonet – kudov samo.

Końasïn selmem dï teke kinoso
Tago nesa minek javoma tarkańt,
Koda vannat melgam roź pakśańt pesë
Dï koda kapšaź kirvazťat cigarkańt…

1986

Maŕavś, a vasolojak škaś,
Źardo avam moń čertnen kodaś.
Źarokśt veľavtś Čint perka Modaś? –
Nej mon avań tusto čertnestë
Sijas navaź pulïnet kodan.

1985

Menel a nejat,
Pertpelga tuń a varštat,
Kapšat jala, kapšat.
Ton čaroso urnëks pevteme veľat-veľat…
Šeškat ve tarkaso, estet maŕavi – eŕat.

1985

Aparońt ejzëm jortïk rudaz pokoľks.
Eś pŕańt viteme bažaź, moń čumondït.
Vizdemań apak soda mančit –
Kije ejstënek sede mańavś?

Isťa lijasto, simemańt javavtoź,
Beŕań lomaneś lijaśmapŕanten selgi.
Son čavo pŕaso tuń a arsi:
Eś ojment paćki – avoľ vedent.

1985

Źardo leti jutams monen tija,
Sëpej mizolks čači turvam pes:
Mon sedejem talnoź tet venstija –
Ton žo sonzë kapšaź nergstïk zeps.

1985