PAĆINE (Odiŕvań urnematneń koŕas)

Večkeń jalginem, mazïj duginem,
Sedejmeľavksom, salavań rizksëm!
Martom javomstot kaźan paćine,
Eseń ledstnemga čamań nardamne.
Mon ve penenteń vikšńan čińśorma,
Ombo penenteń teštan kovśorma,
Paćanť kunškava lemem śormadsa –
Peleveń tešttneń kuros purnasïń.
Polań sajemstë, vastań čijamsto
Te nardamosonť kurgot nardasak.
Rizksëv pingene, nusmańa škasto
Te paćinesënť seľmeť nardasïť.
Kurgoń nardamsto moń palasamak,
Seľmeń nardamsto kutmordasamak.
Martom javomstot mastoroś zëŕkstï,
Meľzëť ledemstëm meneleś gajgstï.

1991

Kodamo rizksëv teči čiś!..
Sedejem tejni avardť-avardť.
Ojmem potmaksos lakavś-piś,
Čulkseti, teke sïre pakarť.

Kodamo rizksëv teči čiś!..
Mon šeržej čerem snartńan kekšems.
Latkov-guborev śkamoń kiś.
Paŕak, lotkan se sirtenť ekšes?

Kodamo rizksëv teči čiś!..
Purnïja vese vijem, nardem:
Janozom lija ava lisś.
Kije nei: sedejem tardi?

Jala pejďan – a nevťan pŕa
Dï norov lišmeks dubu sťakšnan.
Kors a kirdemań meľtneń tŕan,
Kadïk kortïť: «Kežejat», «Pŕa šnat!»

Kodamo rizksëv teči čiś!..
Valskestë čokšnës ejsëť śudan.
Kovoś odiŕvaks vizdeź lisś.
…Źaroće ve učan, a udan…

1991

Moń večkemaś toneť – pŕabezaŕks,
Prok lomaneń kanst lavtovot langso.
Toń sedejsë moneń – anśak taŕks,
Seks mongak eľ keľman, dugaj, vakssot.

Toloś pengevteme sesk madi,
Apak valno kurok kośki ćećaś.
Avečkićań sedejs pek ladi
Zgiľamoń kevkstemaś: mejs son peďaś?

Ojmak, dugaj, učok alamnes,
Moń večkemanť vejsë kurodsïnek
Dï sedejstëm verev sanoń pes
A eŕaviks ejdeks kajavtsïnek!

Moń večkemaś toneť – pŕabezaŕks,
Prok lomaneń kanst lavtovot langso.
Toń sedejsë moneń – anśak taŕks,
Seks mongak eľ keľman, dugaj, vakssot…

1990

Kevs vačkodiń mon kedem,
Varmas putïja vijem –
Činek-venek tekede
Palï sedejem, pii.

Čumovtomo mon čuman,
Paro tejan – aparan,
Pokš sëreďksëm dï umoń,
Kov nej martonzo aran?..

Te toń turtov, duginem,
Mon palïń, teke štatol.
Te toń turtov, ojminem,
Potmo vijem mon štavtïń.

Ton simiť liśmapŕastom.
Tolom vaksso ton ežniť
Dï tuiť eŕazasto:
Mondeń part jala vešniť.

Javoľavtïmik čumoks,
Eŕke nulkso valnïmik.
Sravtnek meľsparot suvoks:
Okojniki, kalmimik!

Kevs vačkodiń mon kedem!
Varmas putïja vijem!
Činek-venek tekede
Palï sedejem, pii…

1991

Činzë valgoź liśan vele ušov,
Pakśań koštto tantejstë leksťan
Dï od kovonť marto kavalaldo
Keŕgalejev stambarnë jutan.

Son moń veti sasto, apak kapša,
Tešteń pusmot kim langa jortï.
Kodat morot morsi moneń kovoś!..
Koda večkemado son kortï!..

Varmaś sravtï Norovoń čerenzë,
Seke keďsënť moń čevťstë sudri.
Vaj, kodamo son koľńaj, mančića,
Mondeń baška zńaroń kutmori!

Mon a kemsa vejkejak valonzo!
Kadïk lijań jožovoś manči!..
Anśak meks kirdevteme sedejeś
Varmanť peľde jala valt uči?!

1991

«Źardojak iľamak palse seľms:
Seľms palamoś, kortïť, javomas.
Javomsto a ojsiť onavas –
Źardojak iľamak palse seľms!

Paćine iľa kazť źardojak:
Paćineń kazemaś – javomas.
Son eŕavkšnï seľvedeń nardams –
Paćine iľa kazť źardojak!

Iľamak polavto lija langs:
Te pravtsamam, dugaj, kulomas.
Mon dï ton – ućaskav vastomaś –
Iľamak polavto lija langs!»

…Eńaldomam sedejsëm, prok kevť:
Keveŕkšniť, eškseviť tej dï tov.
Sïń umok noldamaľť teń oľav,
Anśak ki jovtasï moneń: kov?

1992

Maŕasa, koda tujat ton sedejstëm,
Dï meľgat kenkšeś stambaro pekstavi.
Maŕasa, koda solï sëpeś ejsëm
Dï staka sëreďksëś ojmestëm javi.

Maŕasa, koda tago oľav meńan:
Tondeť arsematne a šeškiť pŕasom,
Toń lemenť turva pesëm a čeveľan
Dï Pazonť a nalkstavtńan vešemasom.

Kosat, ki martat – nej tede a riznan:
Sedejem siześ meľgam ejsëť terdems.
…Eŕamoń lejeś jala laki, biznï,
Teja menďavkssonť čireś tago peŕgedś.

1992