PŔADOVŚ KIZËŚ – MOŃ VEČKEVIKS ŠKAM…

Pŕadovś kizëś – moń večkeviks škam,
Vasolo ki langov narmunť purnï.
Por pandïnes tujemstë lotkaś –
Maŕasak, kodańa vireś uvnï?

Sïń kizënť livteme viŕ čires,
Se tarkanteń, koso kolmo kilejť
Vejke jursto kasïť, prok sazort,
Leťke latksonť sornïť kaleń ilejť.

Kośke śolt potmaksoś ožoldï,
Veľkssëm tumoś sëŕanzo peverdi.
Čova rungo najan piźolksoś
Ćućovsonzo kaštansto jaksterdi.

Toški kizëś tenst nusmańa valt,
Kenkš čiresë paćaso avoli.
Pokš kilejeś peńaćaź kortï –
Teke moń ojmestë valtnë moliť:

Eziń kenerť mazïj škam nejeme,
Eziń kenerť koľneme-eľneme,
Eziń kenerť moramo-kišteme,
Eziń kenerť večkemam kazeme –
Vant, śokseś eŕamozom eľ sï…

1984

Vaj, meks ton eziť čaŕkode
Čevte valso moneń pškadems?
Meks toneť tuń eź čaŕkodev
Tardi ojmenť mejsë vadems?

Eli valt mazïjť a sodat?
Eli jovtamost sïnst vizďat?
Meks moń marto ton a kortat,
Mon žo kaštan korot kirďan?

Merť teń isťa, vitik melem:
Ton moń večkemam, śatkinem.
Sodan, ersi čevteks keleť,
Merť teń: varminem, teštinem.

Merť teń: ojmem, sedejbeľksëm,
Moń meľavksom dï keńarksom,
Ton, prok čiś, ežďat moń ejsë,
Eŕamoso valdo jonksom!..

Buti isťa teń merevliť,
Pekstaź sedejeť panžovlik, –
Ton, paŕak, poët ulevliť
Dï moń ojmem čaŕkodevlik!

Tejteŕpingeś teke ćokov morï,
Kunška poraś kukineks kukordï.
Ki jovtasï: kodamo narmuneks
Sïrečiś eŕamosonť śumordï?

Mon kenkšem dï vaľmamgak pekstavliń –
Iľa sova, sïŕkaj, a eŕavat!
Kadïk ćokovt morïť, riznïť kukot–
Anśak avoľ krenčt dï avoľ kavalt!

…A pekstneviť vaľmatne dï kenkštne:
Ijetne rungovanť kiť-jant keriť.
Tejteŕpingeś sonzë tuń a mari –
Avaksčinteń sïrečiś sejeri…

1985

Śokseń meneľsënť apokš tešte ćitni.
Son śkamonzo dï, ulema, vasolo:
Lembesënzë pinges kińgak eź ežde,
Valdozojak viška štatolnëks palï.
Seks, sekeń vant, a veseneń nejavi.

Mon śadot tešte jutkso – seh viškineś.
Lembem a pačkodi – vasolan ejstëť,
Dï valdomgak a lijatnede lamo –
Umok kekševś sede vijev valdoso.
…Reďavlimikak ton sede ikele!

1985

Vastomaś uľneś lomań pingstë:
«Źardo? Kuvaťs?» – isťakoń valt.
Mik seľmtne peľsť vannomo viďstë:
Tuiť kortamot – keri salt.

Javomaśkak lisś lomań pingstë:
Tago jovtazeľť čavo valt.
Rizksëś lepšťaś sedejtneń pinkssë,
Salavań varštavkstnë – prok nalt.

Tujemstë venstija teť kedem:
Kojtne-kirdatne a kolams!
Toń psi komorso keľmeź kedem
Teke ej pokoľne solaś.

Večkemam! Tejteŕpingeń morom!
Nej, źardo ućaskam keždi,
Maŕan: a kedem psi komorsot –
Tardića sedejem ežni!

1987