GUĽKINE

Eŕaśt-ajšť aťat babat kavonest. Ulneśt synst kavto ejkakšost: ćorïne da tejterne. Babaś praś dï kuloś. Kadovśt ejkakšnë avavtomo. Sïn čistë merit teťasten: „Teťaj, sajt od ava! teťaj, sajt od ava!”

Teťaś meri tenst: „Sajan, ejden, da melezënk tujezë”.

— Mejś a tui? Sajt!

Teťaś sajś od ava. Eŕaśt-ajšť alamos. Od ava meri teťasten: „Pečkik ćorïnet, karman martot eŕamo, a pečksak — a karman!”

Teťaś kulconïze ninzë, pečkize ćorïnenzë. Od avaś pidize i ozaśt stoľ ekšs jarcamo, a tejternent paniź kenkš ugols.

Jarcït sïveldent, lovažatnen jortlit kenkš ugols, tejternent lanks. Tejterś avardi i meze jortït langozonzo lovažatnen — purnï. Koda vese lovažatne purnavśt, śulminze ašo pacines i putïnze pizïne pŕas.

Pizïne pŕasońt lovažatne tejevśt guľkineks. Libor merneś guľkineś, livťaś ulćav.

Jutï ulćava uroń mikšnića. Guľkineś valkś čirke pŕazonzo i meri tenzë: „Uroń mikšnića, a uroń mikšnića! tuka ten ve komoro urot, moro tent moran”. Uroń mikšnićaś maksś tenzë komoro urot. Guľkineś karmaś moramo:

„Guldor- guv- guv- guv! Eś tetinem pečkimem.
" " " " Od avinem pidimem.
" " " " Pŕakavtomo sëvimiź.
" " " " Patinen lanks jortlimiź.
" " " " Moń patinem purnymem.
" " " " Ašo paćas śulmimem.
" " " " Pizïne pŕas putymem.
" " " " Mon guľkineks tejevin.”

Morïze morońt guľkineś i tago tuś livťamo. Jutï karčozonzo salmuksoń mikšnića. Guľkineś ozaś čirkenzë pŕas i meri: „Salmuksoń mikšnića, a salmuksoń mikšnića! Tuka monen ve komoro salmukst, moro tent moran!”

Salmuksoń mikšnićaś maksś tenzë komoro salmukst. Guľkineś morïze tenzë seke morońt i tuś tago livťamo.

Jutï karčozonzo meden mikšnića. Ozaś guľkineś čirkenzë pŕas i meri tenzë: „Meden mkišnića, a meden mikšnića! Tuka monen ve penč med, moro moran tent”. Meden mikšnićaś maksś tenzë med. Guľkineś karmaś moramo: „Guldor-guv-guv-guv! Eś tetinem pečkimem.”

Moravś morozo, tago tuś livťamo. Livťaś mekev kudov. Ozaś kudo kenkš velksës i karmaś moramo:

„Guldor- guv- guv- guv! Eś tetinem pečkimem.
" " " " Od avinem pidimem.
" " " " Pŕakavtomo sëvimiź.
" " " " Patinen lanks jortlimiź.
" " " " Moń patinem purnymem.
" " " " Ašo paćas śulmimem.
" " " " Pizïne pŕas putymem.
" " " " Mon guľkineks tejevin.”
Marize moramodo teťazo. Panžize kenkšent i vanï verev kurgoń avteź. Guľkineś kainze kurgozonzo komoro urotnen. Teťaś povavś dï kuloś.

Guľkineś tago karmaś moramo: „Guldor-guv-guv!!.” Marize od avaś. Liś kudïkelev, avtize kurgozo i kulconi. Guľkineś kainze kurgozonzo komoro salmuksnën. Povavś od avaśkak i kuloś.

Guľkineś tago karmaś moramo: „Guldor-guv-guv”. Marize paťazo. Liś kudïkelev i kulconi. Guľkineś kaize kurgozonzo med penčent, a sonś tejevś mekev ćorïneks i karmaśt paťańt marto kavonest eŕamo.

Makar Evsevjev. Erźań jovkst // Purnïnze M.E. Evsevjev — Moskva: SSSR-en Narotnën centraľnoj izdatelstvaś, 1928