Примеры текста
Zontik dï Panamka
Eŕaś-ašteś Zontik. Lijatnede a javovića, viškinestë purnavića. Ťusozo sëneľ. Eŕamosonzo vesemeś uľneś vadŕa, vejkede baška. Son lisneś uľćav anśak pizeme škane, sekskak arseś, buto perť-peľksëś sval načko, menelenť ťusozojak valdoks a ersi.
«Vaj, kodamo nusmańa eŕamom? – kortaś eś pačkanzo, kirmićavoź a pokške śuvorksoks. – Vaj, kodaška tošnačim!»
– Mezť seke tev stakasto uksńat? – vesť kevkstize Zontikenť sïre Šľapaś, konaś ašteś teke žo škapsonť, anśak sede vere lavćanť langso.
– Mezes, toń kojsë, kecnems? – tago stakasto ukstaś Zontikeś. – Perťpeľga anśak pizemeť valïť… Načko…
– Vaj, pajstomne! – sedejmaŕaś tenzë Šľapaś. – Alkukskak, ton vadŕa pogodajak eziť nekšne! Ušov ejsëť livtniť anśak pizeme alga. Pajstomo, koda meľavtan kisëť!
– Tošna teń! – tago ukstaś Zontikeś.
Šľapaś źarïja ška arseś, mejle meri:
– Varčasa lezdams teť. Kunsolok, meze meŕan! Nesak se sumkanť? Sï nedľačistë ton, a nejemga, keverť ejzënzë. Čaŕkodik?
– Čaŕkodija, – merś Zontikeś. – Mejle meze?
– Mejle? – mizoldoź merś Šľapaś. – Mejle tonś nesak…
Sïre Šľapanť prevsputomazo Zontikenteń ovse eź čaŕkodeve, anśak nedľačistë tejś isťa, koda tenzë merś Šľapaś. Apak maŕa, apak neje, son keverś valdo sëń pokš sumkanteń, konań bokaso uľneś risovaź troks putoź matrosoń kartuzso keńarksov ćorabajeń čačo.
Sumkaś vasńa čavoľ. Mejle ejzënzë neŕgsť eŕva mezť, dï kov-buti saiź. Zontikeś pongś sehte alov. Sonzë langs praś kodamo-buti ečke kniga. Knigaś apak lotkse motordś, bažaś veľavtoms dï mujems estenzë jon tarka, anśak te teveś tenzë kodajak eź tejeve. Zontikenť vaksso madeź ašteś keľme limonadto pešťaź sulika. Sulikaś kežejstë buľkajeś dï melezëľ valoms vese vedenzë lijatneń langs.
Pupića sursemeś peznavtïnze pejenzë Zontikenť pŕa kočoms dï isťa meľsparoso čikordś ejsëst, natoj kavto pejtneń sindinze.
Okojniki kuvaka ki langoś pŕadovś. Zontikeś čaŕkodize, sumkanť kozoń-buti putïź. Mejle panžiź, meze-buti ejstënzë sajsť dï pekstïź ods.
Perť-peľga kaštmolezevś. Zontikenť turtov te uľneś sedejak beŕań. Sumkaś mezde-buti karmaś ežeme. Zontikenteń a mejsë karmaś leksems. Apak učne sumkaś tago panžovś dï te škane Zontikeś praś ušov. Son ovse eź čaŕkode, meks langozonzo vese teťkiź seľmest, prok tamaša langs, teke neiť vasenćede? Pejdsť-tejsť, dï panžiź…
Zontikeś divamodonť vajkstaś dï eľ eź pra mastorov. Son isťamo valdo či onstonzojak eź nekšne. Perťpeľga vesemeś uľneś pek mazïj!
Valdo-sëń meneľ, psi čipaj, sëń moŕa, ožo čuvar dï śadot isťat žo zontikt, kodamo son, anśak śormavt dï eŕva kodamo ťusoń.
Tede vesemedenť Zontikenť karmaś čaramo pŕazo. Čaraś, čaraś, čaraś…
Vana alamodo saś jožos, varštaś tej-tov dï avoľ pek vasolo, merema, ovse vakssonzo, neś valdo śormav šľapine. Kodamo-buti lija jonov a molića, peŕkanzo śulmseź lamo surepulot. Isťamo šľapa Zontikeś tede ikele eź nekšne.
– Ton kijat? – kevkstize Zontikeś šľapinenť.
– Mon? – divazevś šľapineś. – Panamka.
– Pa-nam-ka… – slogoń slog jovtïze Zontikeś, dï eź soda, mezde kortams sede tov.
– A mon toń sodatan. Ton – Zontik! – merś Panamkaś. – Anśak a čaŕkoďan, nej žo pizeme araś? A toń konďamo zontiktne pľažov a jakiť.
– Mon… Mon… – Zontikeś eź soda meze merems, sekskak kelezë pongoneś. – Mon sïń tonť langs varštamo! – okojniki muś valt Zontikeś.
– Moń langs? – divazevś Panamkaś. – Mezeks te teť eŕavi?
– Veľť ton mazïjat! – merś Zontikeś.
– Gm, – mizoldozevś Panamkaś dï merś vizdeź.
– Tongak moń meľs tuiť.
– Žaľ, – stakasto ukstaś Zontikeś.
– Meześ žaľ? – kevkstize Panamkaś.
– Kurok čokšne dï savi minenek javovoms.
– Alkukskak, – isťa žo ukstaś Panamkaś. – Ton ešte sat tej?
– A sodan, – merś Zontikeś. – Mon žo avoľ pľažga jakićan. Pizeme araś.
– Mejle meze?
Te škastonť Zontikenť purnïź dï son tago pongś sodaviks sumkanteń. Anśak nej sehte vereľ. Sudozojak tarnoś ušoso, seľmenzëjak nesť meze tejevi peŕkanzo.
Jalateke jožozo beŕaneľ. Son arseś mazïj šľapinedenť — Panamkadonť. Čumondś eś pŕanzo, meks eź kenere tenzë merems «Vastomazonok!».
Te škastonť Zontikeś varštaś viť jonov dï… Isťaška keńarks! Ovse malaso kodaź kepternesë ašteś son – Panamkaś!
– Škaś a mensťama! – arsezevś Zontikeś. Dï ezize mensťa. Veľavtś, venstize Panamkanteń esenzë keme kedenzë dï merś:
– Kundak sede kuroksto!
Panamkaś vasńa tandadś, mejle saś ježos, peleź kundaś Zontikenť keďs dï sornoź, jutaś Zontikenť jonov…
…Se škastonť sajeź škapsonť sïń kavonest. Nej Zontikeś ovse a tošnakali pevteme pizemetneń ejstë. Son sodï, kudoso uči ejsënzë Panamkaś, konaś pek moli čipajenť jonov. Panamkanť nejeź, Zontikenť seske lembelgadï jožozo dï keńardozevi sedejezë.
Vere lavćanť langso sïre Šľapaś vanï langozost dï kaštmoli, anśak koj-źardo kuvakasto ukstni, paŕak, ledstni seń, meześ uš umok jutaś.
Зонтик ды Панамка
Эрясь-аштесь Зонтик. Лиятнеде а явовиця, вишкинестэ пурнавиця. Тюсозо сэнель. Эрямосонзо весемесь ульнесь вадря, вейкеде башка. Сон лиснесь ульцяв ансяк пиземе шкане, секскак арсесь, буто перть-пельксэсь свал начко, менеленть тюсозояк валдокс а эрси.
«Вай, кодамо нусманя эрямом? – кортась эсь пачканзо, кирмицявозь а покшке сюворксокс. – Вай, кодашка тошначим!»
– Мезть секе тев стакасто укснят? – весть кевкстизе Зонтикенть сыре Шляпась, конась аштесь теке жо шкапсонть, ансяк седе вере лавцянть лангсо.
– Мезес, тонь койсэ, кецнемс? – таго стакасто укстась Зонтикесь. – Пертьпельга ансяк пиземеть валыть… Начко…
– Вай, пайстомне! – седеймарясь тензэ Шляпась. – Алкукскак, тон вадря погодаяк эзить некшне! Ушов эйсэть ливтнить ансяк пиземе алга. Пайстомо, кода мелявтан кисэть!
– Тошна тень! – таго укстась Зонтикесь.
Шляпась зярыя шка арсесь, мейле мери:
– Варчаса лездамс теть. Кунсолок, мезе мерян! Несак се сумканть? Сы недлячистэ тон, а неемга, кеверть эйзэнзэ. Чарькодик?
– Чарькодия, – мерсь Зонтикесь. – Мейле мезе?
– Мейле? – мизолдозь мерсь Шляпась. – Мейле тонсь несак…
Сыре Шляпанть превспутомазо Зонтикентень овсе эзь чарькодеве, ансяк недлячистэ тейсь истя, кода тензэ мерсь Шляпась. Апак маря, апак нее, сон кеверсь валдо сэнь покш сумкантень, конань бокасо ульнесь рисовазь трокс путозь матросонь картузсо кенярксов цёрабаень чачо.
Сумкась васня чаволь. Мейле эйзэнзэ нерьгсть эрьва мезть, ды ков-бути саизь. Зонтикесь понгсь сехте алов. Сонзэ лангс прась кодамо-бути эчке книга. Книгась апак лотксе мотордсь, бажась велявтомс ды муемс эстензэ ён тарка, ансяк те тевесь тензэ кодаяк эзь тееве. Зонтикенть вакссо мадезь аштесь кельме лимонадто пештязь сулика. Суликась кежейстэ булькаесь ды мелезэль валомс весе ведензэ лиятнень лангс.
Пупиця сурсемесь пезнавтынзе пеензэ Зонтикенть пря кочомс ды истя мельспаросо чикордсь эйсэст, натой кавто пейтнень синдинзе.
Окойники кувака ки лангось прядовсь. Зонтикесь чарькодизе, сумканть козонь-бути путызь. Мейле панжизь, мезе-бути эйстэнзэ сайсть ды пекстызь одс.
Перть-пельга каштмолезевсь. Зонтикенть туртов те ульнесь седеяк берянь. Сумкась мезде-бути кармась эжеме. Зонтикентень а мейсэ кармась лексемс. Апак учне сумкась таго панжовсь ды те шкане Зонтикесь прась ушов. Сон овсе эзь чарькоде, мекс лангозонзо весе тетькизь сельмест, прок тамаша лангс, теке неить васенцеде? Пейдсть-тейсть, ды панжизь…
Зонтикесь дивамодонть вайкстась ды эль эзь пра масторов. Сон истямо валдо чи онстонзояк эзь некшне. Пертьпельга весемесь ульнесь пек мазый!
Валдо-сэнь менель, пси чипай, сэнь моря, ожо чувар ды сядот истят жо зонтикт, кодамо сон, ансяк сёрмавт ды эрьва кодамо тюсонь.
Теде весемеденть Зонтикенть кармась чарамо прязо. Чарась, чарась, чарась…
Вана аламодо сась ёжос, варштась тей-тов ды аволь пек васоло, мерема, овсе вакссонзо, несь валдо сёрмав шляпине. Кодамо-бути лия ёнов а молиця, перьканзо сюлмсезь ламо сурепулот. Истямо шляпа Зонтикесь теде икеле эзь некшне.
– Тон кият? – кевкстизе Зонтикесь шляпиненть.
– Мон? – дивазевсь шляпинесь. – Панамка.
– Па-нам-ка… – слогонь слог ёвтызе Зонтикесь, ды эзь сода, мезде кортамс седе тов.
– А мон тонь содатан. Тон – Зонтик! – мерсь Панамкась. – Ансяк а чарькодян, ней жо пиземе арась? А тонь кондямо зонтиктне пляжов а якить.
– Мон… Мон… – Зонтикесь эзь сода мезе меремс, секскак келезэ понгонесь. – Мон сынь тонть лангс варштамо! – окойники мусь валт Зонтикесь.
– Монь лангс? – дивазевсь Панамкась. – Мезекс те теть эряви?
– Вельть тон мазыят! – мерсь Зонтикесь.
– Гм, – мизолдозевсь Панамкась ды мерсь виздезь.
– Тонгак монь мельс туить.
– Жаль, – стакасто укстась Зонтикесь.
– Мезесь жаль? – кевкстизе Панамкась.
– Курок чокшне ды сави миненек явовомс.
– Алкукскак, – истя жо укстась Панамкась. – Тон эште сат тей?
– А содан, – мерсь Зонтикесь. – Мон жо аволь пляжга якицян. Пиземе арась.
– Мейле мезе?
Те шкастонть Зонтикенть пурнызь ды сон таго понгсь содавикс сумкантень. Ансяк ней сехте верель. Судозояк тарнось ушосо, сельмензэяк несть мезе тееви перьканзо.
Ялатеке ёжозо берянель. Сон арсесь мазый шляпинеденть — Панамкадонть. Чумондсь эсь прянзо, мекс эзь кенере тензэ меремс «Вастомазонок!».
Те шкастонть Зонтикесь варштась вить ёнов ды… Истяшка кеняркс! Овсе маласо кодазь кептернесэ аштесь сон – Панамкась!
– Шкась а менстяма! – арсезевсь Зонтикесь. Ды эзизе менстя. Велявтсь, венстизе Панамкантень эсензэ кеме кедензэ ды мерсь:
– Кундак седе куроксто!
Панамкась васня тандадсь, мейле сась ежос, пелезь кундась Зонтикенть кедьс ды сорнозь, ютась Зонтикенть ёнов…
…Се шкастонть саезь шкапсонть сынь кавонест. Ней Зонтикесь овсе а тошнакали певтеме пиземетнень эйстэ. Сон соды, кудосо учи эйсэнзэ Панамкась, конась пек моли чипаенть ёнов. Панамканть неезь, Зонтикенть сеске лембелгады ёжозо ды кенярдозеви седеезэ.
Вере лавцянть лангсо сыре Шляпась ваны лангозост ды каштмоли, ансяк кой-зярдо кувакасто укстни, паряк, ледстни сень, мезесь уш умок ютась.