Erźań aktivistnë tiriń kelenteń tonavtnemga anokstasť sajt

Ińazoroń Sekretariatozo, noldaś  od resursoń Inealtïmaso prezentaćija. Te resursonť ťokšmeleś kelejgavtoms erźaks kortamodonť sodamočinť.

Sajtsonť «ruzoń- erźań» dï «erźań ruzoń» valkstnë, elektronoń kinigań biblioteka, erźań kelenteń «Eś pŕań tonavtïća» (samoučiteľ) dï eŕva kodat putovkst, konat lezdïť važodems erźaks śormadozenť marto. 

Ińazoroś jovtïze melenzë noldaź projekttënť.

— Pek lamo teči śormadoź Rossijań Federaćijaso tiriń keľtneń kažočidenť. Neť keľtneń raśketne snartniť vanstamo, veľmevteme, anśak neť teŕavtomatneń kisë kirdivijeś sïnst čumovtï «separatizmaso dï rusofobijaso». Lomańtne isťa tandavtneź, natoj peliť kameras erźań valmorojak lovnomo, teškstïze Ińazoroś.

Sonzë kojsë, kirdijenť assimiľaćijań politikadonť tiriń raśkenť vanstomga eŕavi važodems teči.

— Vijevgavtoms erźań kelenť pozićijatneń Inealtïmaso – vejkeś seť karmavtomatnede, konat topavtan mon Ińazoroń kojsë dï Aťań Ezemeś. Miń teinek te sajtonť eś jarmak langs, kodamojak lezdamo araseľ koda respublikań kirdivijdenť peľde isťa lija mostortnëdejak. Nej erźatne važodiť erźań-ruzoń dï ruzoń-erźań valkstnëń marto. Ejsëst 19 643 valt dï valśulmavkst, konatatneń eŕaza erźatne purnasť kemeń ijeń kuvalt. Te erźa raśkenť vejsëń valksoś. Teke škastonť miń purnatano tozoń jovkskeť, jovtnemat, valmorot, – merś Sïreś.

Te sajtonť tejemga važodsť sisem lomanť. Valksoś tejeź setneń turtov kiń uli melest tonavtnems erźań kelenteń dï sonzë vadŕalgavtïćatneneńgak. Vese tolkovića tekstnë, instrukćijatne, śormadoź ruzoks. Erźań tekstnë śormadoź latinëń tešksë, konatnesë śormadoviť vese erźań Kirdijüronť dokumentënzë.

Rossijań Federaćijasonť zakontnësë kardaź latinëń grafikań tevsputomaś respublikań keľtnes. Erźań keleś vejkeś Mordovijań kirdij keľtnede.

Tede ikele Ińazoroń Sekretariatoś nevtize «ERŹAŃ VAL» žurnaloń prezentaćijazo, kona sravtnevi  końovs putoź, isťa Inealtïmasojak.

Sïća škastonť Ińazoroń Sekretariatoś anokstï erźań ejdetneń turtov audio knigań noldamo.

"Idel.Realii" ikele jovtnesť «Erźań kočkavića kurotneń kočkamodo dï važodemado Kojluvdonť», kona uľneś kemekstaź Aťań Ezemsënť. Kojluvosonť lamo vejkeksči krïmeńtatartnëń Kojluvonť marto.