Audiobooks

Boris Istľajev

Boris Jegorovič Istľajev. Erźań lomań. Čačś 1928 će ijestënť «Novaja Ťaglovka», Kočkur bujeń velesënť. Te velesënť jutavtïze vese eŕamonzo. Tukšnoś anśak vesť, źardo kenkšezënzë vačkodś tortinges. Veľavtś tosto 1950 ijestënť. Velesënť učoś sonzë Marija Rangajeva tejtereś. Uŕvaksť, kastasť kemeń ejdeť! Eŕamost perť važodsť apak lotkse. Škaś uľneś a šožda. Teń langs apak vano Boris Jegorovič kenerkšneś moramo, seďaś garmonijaso dï balalajkaso, dï sermaleś nuŕkine jovtnemat. Śormadś dï kučnoś Kočkurbujeń «Zaŕa» kuľalopanteń. Teči śormadïćaś a martonok. Śormali, paŕak, sërďatneń jutkso, tona jono, umaŕpiresë…

Teči sonzë śormadovksonzo lovnï nućkazo, Bajagine. Mazïj dï prevej erźań tejtereś.

Taťana Razguľajeva

Vasenće avtoroś, kona šnïze  melemek veľavtoms jovksonzo audioformats. Kortamoś moľś «Eŕaś-ašteś jovkske» kinigadonzo. Kinigaś pešťaź jovksoń valdoso. Son altaź erźań ejdetneneń. Jovkstnë tonavtïť tirinsenť večkeme, kisënzë meľsparoso ašteme.

Erźań śormadej, valmoroń ladsij. «Śatko» kovstavksonť pŕavtredaktor. Pŕadïze M.Je. Jevsevev lemsë institutoń filologijań fakuľtetënť. Śormadovksonzo pečatavsť «Erźań pravdaso», «Śatkoso» dï «Čilisemaso». Škań jutaź lamotne ejstëst lissť «Teštine» dï «Oćor» pusmotnesë. Malav 20 ijeť važodś «Erźań pravda» kuľalopasonť. Sede tov, – «Śatko» žurnalsonť Nej son – «Śatkonť» pŕavtredaktorozo. 2008 ijestë sonzë liś knigazo – «Peverdeź čovaľat». Śormadï očerkť, jovtnemat, novellat.

Aleksandr Tikšajkin

Śormadej. Ine erźań lomań. Alkuksoń pitne, erźań raśkesënť, sonenzë teškas apak puto…

Čačś 1960-će ijeń davolkovoń 4-će čistënť, Dubenka bujeń Antonovka velesënť.  Pŕadïze N.P. Ogaŕovoń lemsë universitetënť. Tede mejle važodś «Molodoj leninec», «Pobeda», «Erźań pravda» kuľalopatnesë. Alamodo a kemeń ijeť važodś «Śatko» žurnalsonť.

Vasenće knigazo «HH pingeń lomań» uľneś noldaź 2001-će ijestënť, omboćeś «Valdokužo» 2002, kolmoćeś «Urozkeť»  2008-će ijestënť. Śormadś sede, mezde lijat śormadejtne, dï kirdivijeń «štatnojť śormadïćatne» čaťmonsť eli mančesť.

Kemeń ijeť, eś jarmak langs noldaś «Rator» žurnalonť. Lamoksť pškaleś kirdivijenteń lezamoń kuvalt, anśak isťat śormadejtne dï žurnaltnëjak kirdivijenten ezť eŕavo.

Mejeľće ijetnestë eŕaś Saran ošso nužačisë. Važodemazo araseľ. Sëredś. Jakaś ormav jalaksonzo meľga. Eŕasť kavonest jalaksonzo invalidëń pensija langs. Teń langs apak vano važodś Aťań Ezemsënť. Pek lamo vijť putś «Erźań kočkavića kurotneń kočkamodo dï važodemado Kojluvoń» śormadomanteń. 

Kuloś 2020-će ijeń meďkovoń 28-će čistënť. Kalmaź Oťažbujeń Sabanćele velesënť.

Eŕuš Vežaj (Jeŕušov Boris Aleksejevič)

Sodaviks erźań poët dï śormadej, lija keľstë jutavtïća, «Ruća» lezëpargonť vetića. Baška valmoronzo putoź moroluvs dï moraź. Baška jovksonzo, śormadovksonzo, gajtevteź audiokinigaso. Śormadovksonzo, jovksonzo, valmoronzo, sotaź eś raśkeń, eś keleń večkemaso. Vese vijezë, eŕamozo, eŕva valozo dï tevezë, putï erźań tevs, vanstomga dï kastomga tiriń raśkenť dï kelenť.